إلى فين رايحة فينا يا عدن .. النهاية !

  بقلم/ محمد عادل الاعسم:

  ذهبنا الى المطار (مطار عدن) امس حسب موعد حجزنا و رحلتنا انا والوالده واخي واختي وهم مسافرين لعلاج الوالدة في مصر ..وصلنا المطار الساعه 6 صباحاً والرحله موعدها الساعه 9 قلنا نروح بدري عشان ما نعطيهم عذر المهم وصلنا وفي موظف واحد فقط على الكونتر وعليها زحمه وصياح واكثر من 25 شخص هذا يصيح وهذا يقول انا حاجز اليوم وفوضى انتظرنا حتى وصلنا الى الموظف. اعطيناه التذاكر قال: مافيش حجز لكم اليوم قلت له تاكد يا اخي قدنا حاجز من قبل شهر وقلتوا الحجز مؤكد قال : يا اخي روح عند المدير قلت له: من المدير فينه؟؟ قال هذاك اشر لي على واحد ماسك حسابه ويدور عند المسافرين و زحمه فوقه هذا المدير اسمه “اي…” طبعاً الاخ “اي…” شغلته يدور على المسافرين الي تم عرقلة حجوزهم يقولهم تشتي تطلع عليك كذا كذا مبلغ والله ويحسب بالحسابه و يوريك تشتي تسافر ادفع 300 دولار ولا روح بسرعه باقي للرحله ساعه طيب وسط الزحمه هذي والصياح وحده حجه عمرها فوق 70 سنه و جريح عزكم الله برازه و بوله ماسكه بالقسطره بيده ..الحجه تقوله اني فدالك يا ابني طلعتني حجزي اليوم اني مريضه ما اقدر لهذي البهذله ارحمني قال : ادفعي ولا روحي طيب فين حجزي وليش ادفع؟؟

ااااح بس اااح المهم والجريح هذا يقوله “اي…” تشتي تطلع انت اطلع ابنك المرافق معك يروح و لا يدفع و الولد يقوله يا مدير والله بجلس بالارض و لا بوقف وقفه بطياره ابي ميقدرش يسافر وحده لو سمحت وهو ولا كانه يكلمه مشى!!!

المهم رحنا عند هذا “اي…” قالي اطلع عند وحده اسمه “فه…” طلعنا عنده وهي تتكلم اقسم بالله من( نخره) كان الطياره والتذاكر على حساب البابا تقول لواحد رجال سع ابوها شكله بسيط مش فاهم بالاجراءت تقوله انت غبي ايش الغباء هذا ما تفهمش وانا والله مصدوم قام واحد ثاني قاله عيب يا بنتي جالسه تمشي معارفيك واحنا واقفين قالت له استحي على شيبتك واجلس بحترامك ولا اخرج وكانهم يشحتوا منها المهم اتصايحنا احنا والعصابه هذي. والموظفه (المحترمه )و قالو لنا الامن خلاص يا اخي راعي برع واعطي الورق للموظفه الثانيه ما فيش داعي للصياح انتظر وبيقع خير قامت الاخت الي اخذت التذاكر نسيت اسمها والله موظفه بالدور الثاني المهم خرجت وقفلت المكتب و ورق الناس معاها و روحت يتصلوا بها قالت مش فاضيه ههههه عادها وصلت الساعه 10 و روحت 12 وهي الوحيده الي الحجوزات عندها والله اكلمك بالي يحصل فعلاً تخيلوا روحت واحنا اكثر من25 شخص تلاعبوا بحقنا الحجز و منتظرين لها ..بعد هذا كله الصياح والمضرابه والمطار كانه (فرزه)
اجا الطيار معه اربعه اصحابه طلعهم واحنا نتفرج قلنا “لإي…” يا مدير هذا كيف طلعهم قال هذا طيار له صلاحيات مالكم هذا يعمل الي يشتي. لا تدوخ بي الي يشتي يسافر يدفع ويطلع بسرعه الرحله بتمشي والي معه بيس دفع 300 دولار وطلع ..

هذا حالنا اقسم لكم بالله كانهم عصابة و دجالين لا رحموا مريض و لا جريح المهم روحت انا بأمي المريضه وبقية الناس روحت قالوا تعالوا الاحد بنشوف كيف ههههههه هذا الظلم والافتراء واستغلال حاجه المسافرين يحدث في مطار عدن الدولي و من قبل موظفين اليمنيه !!!

تنويه / انا احمل اليمنيه المسئوليه الكامله اذا حدث لامي اي شيء بعد تاخير سفرها وهي مريضه جدا وانا انتظرت لأكتر من شهر لاجد حجز وبعدها يتسمسروا و يتلاعبوا و يستغلوا حاجة الناس للسفر ..
هذا ما حصل و انا مسوؤل عن كل كلمه قلتها وكل من شارك في هذا الظلم والعبث معروفين وبالاسم

وتحية لرجال امن المطار بقياده القائد ابو اسحاق الخيلي الذي وقف بجانب المسافرين ..

انتهى ..